ಮಡಿಕೇರಿ : ಕರ್ನಾಟಕದ ಪ್ರಮುಖ ಪ್ರವಾಸಿ ತಾಣಗಳಿಗೆ ವಾಯು ಸಂಪರ್ಕ ಬಲಪಡಿಸುವ ನಿಟ್ಟಿನಲ್ಲಿ ರಾಜ್ಯ ಸರ್ಕಾರ ಮಹತ್ವದ ಯೋಜನೆ ರೂಪಿಸಿದೆ. ಕೊಡಗು, ಹಂಪಿ ಹಾಗೂ ಚಿಕ್ಕಮಗಳೂರಿನಲ್ಲಿ ಹೊಸ ವಾಯುಯಾನ ಮೂಲಸೌಕರ್ಯ ಅಭಿವೃದ್ಧಿಪಡಿಸಲು ಉದ್ದೇಶಿಸಲಾಗಿದ್ದು, ಕೊಡಗಿನಲ್ಲಿ ಗ್ರೀನ್‌ಫೀಲ್ಡ್ ಹೆಲಿಪೋರ್ಟ್ ನಿರ್ಮಾಣಕ್ಕೆ ಸಿದ್ಧತೆ ನಡೆದಿದೆ.
ಕುಶಾಲನಗರ ತಾಲೂಕಿನ ಚಿಕ್ಕತೂರು ಗ್ರಾಮದಲ್ಲಿ ಸುಮಾರು 7.2 ಎಕರೆ ಪ್ರದೇಶದಲ್ಲಿ ಹೆಲಿಪೋರ್ಟ್ ನಿರ್ಮಿಸಲು ಉದ್ದೇಶಿಸಲಾಗಿದೆ. ಕರ್ನಾಟಕ ರಾಜ್ಯ ಕೈಗಾರಿಕಾ ಮತ್ತು ಮೂಲಸೌಕರ್ಯ ಅಭಿವೃದ್ಧಿ ನಿಗಮ (KSIIDC) ಯೋಜನೆಯನ್ನು ಕೈಗೆತ್ತಿಕೊಳ್ಳಲಿದೆ. MI-172 ಮಾದರಿ ಹೆಲಿಕಾಪ್ಟರ್‌ಗಳಿಗೆ ಸೌಲಭ್ಯ ಪ್ರಸ್ತಾವಿತ ಮಡಿಕೇರಿ ಹೆಲಿಪೋರ್ಟ್ ಅನ್ನು MI-172 ಅಥವಾ ಅದೇ ವರ್ಗದ ಹೆಲಿಕಾಪ್ಟರ್‌ಗಳನ್ನು ನಿರ್ವಹಿಸುವ ಸಾಮರ್ಥ್ಯ ಹೊಂದುವಂತೆ ವಿನ್ಯಾಸಗೊಳಿಸಲು ಉದ್ದೇಶಿಸಲಾಗಿದೆ.
ಹೆಲಿಪೋರ್ಟ್‌ಗೆ ಸಂಬಂಧಿಸಿದ ವಿವರವಾದ ಯೋಜನಾ ವರದಿ (DPR) ಈಗಾಗಲೇ ಸಿದ್ಧವಾಗಿದ್ದು, ಇತ್ತೀಚಿನ Schedule of Rates ಆಧರಿಸಿ ಪರಿಷ್ಕರಿಸಲು ಸಲಹೆಗಾರರಿಗೆ ಸೂಚಿಸಲಾಗಿದೆ.
ಹೆಲಿಪೋರ್ಟ್‌ನಲ್ಲಿ ಅಗತ್ಯವಿರುವ ಮೂಲಸೌಕರ್ಯವನ್ನು ಅಂತಿಮಗೊಳಿಸುವ ಮುನ್ನ ಪ್ರವಾಸಿಗರು, ಪ್ರಯಾಣಿಕರ ಸಂಚಾರ, ಸ್ಥಳೀಯ ಆರ್ಥಿಕ ಚಟುವಟಿಕೆ ಹಾಗೂ ಭವಿಷ್ಯದ ಹೆಲಿಕಾಪ್ಟರ್ ಸೇವೆಯ ಬೇಡಿಕೆಯನ್ನು ಅಧ್ಯಯನ ಮಾಡಲಾಗುತ್ತದೆ.
ಕೊಡಗಿಗೆ ವೇಗದ ವಾಯು ಸಂಪರ್ಕ.
ಕೊಡಗು ಜಿಲ್ಲೆಯಲ್ಲಿ ಪ್ರಸ್ತುತ ಯಾವುದೇ ವಿಮಾನ ನಿಲ್ದಾಣವಿಲ್ಲ. ಮಡಿಕೇರಿಯಿಂದ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಸುಮಾರು 137 ಕಿ.ಮೀ. ದೂರದಲ್ಲಿದ್ದು, ಮೈಸೂರು ಮತ್ತು ಕಣ್ಣೂರು ವಿಮಾನ ನಿಲ್ದಾಣಗಳೂ ಪ್ರಮುಖ ಆಯ್ಕೆಗಳಾಗಿವೆ. ಹೊಸ ಹೆಲಿಪೋರ್ಟ್ ಕಾರ್ಯಾರಂಭವಾದರೆ, ರಸ್ತೆ ಮೂಲಕ ದೀರ್ಘ ಪ್ರಯಾಣ ಮಾಡಬೇಕಿರುವ ಪ್ರವಾಸಿಗರಿಗೆ ವೇಗದ ಪರ್ಯಾಯ ಸಂಪರ್ಕ ಲಭ್ಯವಾಗುವ ಸಾಧ್ಯತೆಯಿದೆ.
ಹಂಪಿ, ಚಿಕ್ಕಮಗಳೂರಿಗೂ ಹೊಸ ಯೋಜನೆ.
ಕೊಡಗು ಮಾತ್ರವಲ್ಲದೆ ಹಂಪಿ ಮತ್ತು ಚಿಕ್ಕಮಗಳೂರಿನಲ್ಲೂ ವಾಯುಯಾನ ಮೂಲಸೌಕರ್ಯ ಅಭಿವೃದ್ಧಿಪಡಿಸಲು ಸರ್ಕಾರ ಯೋಜಿಸಿದೆ.
ಹಂಪಿ: ಕಮಲಾಪುರ ಸಮೀಪ 10 ಎಕರೆಗೂ ಹೆಚ್ಚು ಪ್ರದೇಶದಲ್ಲಿ ಗ್ರೀನ್‌ಫೀಲ್ಡ್ ಹೆಲಿಪೋರ್ಟ್.
ಚಿಕ್ಕಮಗಳೂರು : ಸುಮಾರು 137 ಎಕರೆ ಪ್ರದೇಶದಲ್ಲಿ ಏರ್‌ಸ್ಟ್ರಿಪ್‌ ಕಮ್‌ ಹೆಲಿಪೋರ್ಟ್.
ಚಿಕ್ಕಮಗಳೂರು ಯೋಜನೆಯಲ್ಲಿ ಏರ್‌ಸ್ಟ್ರಿಪ್‌, ಹೆಲಿಕಾಪ್ಟರ್ ಸೌಲಭ್ಯ ಹಾಗೂ ಪ್ರಯಾಣಿಕರ ಟರ್ಮಿನಲ್ ನಿರ್ಮಾಣ.
ಆಗಮಿಸುವ ಮತ್ತು ನಿರ್ಗಮಿಸುವ ತಲಾ 20 ಪ್ರಯಾಣಿಕರನ್ನು ನಿರ್ವಹಿಸುವ ಸಾಮರ್ಥ್ಯದ ಟರ್ಮಿನಲ್ ನಿರ್ಮಿಸುವ ಉದ್ದೇಶ.
ಪ್ರವಾಸೋದ್ಯಮಕ್ಕೆ ಹೊಸ ವೇಗ.
ಕೊಡಗು, ಹಂಪಿ ಹಾಗೂ ಚಿಕ್ಕಮಗಳೂರು ರಾಜ್ಯದ ಪ್ರಮುಖ ಪ್ರವಾಸಿ ತಾಣಗಳಾಗಿದ್ದು, ಉತ್ತಮ ವಾಯು ಸಂಪರ್ಕ ಕಲ್ಪಿಸುವ ಮೂಲಕ ಪ್ರವಾಸೋದ್ಯಮಕ್ಕೆ ಮತ್ತಷ್ಟು ಉತ್ತೇಜನ ನೀಡುವುದು ಯೋಜನೆಯ ಪ್ರಮುಖ ಉದ್ದೇಶವಾಗಿದೆ. ಯೋಜನೆಗಳು ಜಾರಿಗೆ ಬರಲು ವಾಯುಯಾನ, ಪರಿಸರ ಸೇರಿದಂತೆ ಅಗತ್ಯ ಕಾನೂನುಬದ್ಧ ಅನುಮತಿಗಳನ್ನು ಪಡೆಯಬೇಕಿದೆ. ಯೋಜನೆ ಕಾರ್ಯರೂಪಕ್ಕೆ ಬಂದರೆ ಕೊಡಗಿನ ಪ್ರವಾಸೋದ್ಯಮ, ವ್ಯಾಪಾರ ಹಾಗೂ ಪ್ರಾದೇಶಿಕ ಸಂಪರ್ಕಕ್ಕೆ ಹೊಸ ಬಲ ಸಿಗುವ ನಿರೀಕ್ಷೆಯಿದೆ.
