ಮಂಗಳೂರು : ಮಂಗಳೂರು–ರಾಸ್ ಅಲ್ ಖೈಮಾ ನಡುವೆ ನೇರ ವಿಮಾನ ಸೇವೆ ಆರಂಭ.!

ಮಂಗಳೂರು : ಮಂಗಳೂರು ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್‌ನ (ಯುಎಇ) ರಾಸ್ ಅಲ್ ಖೈಮಾ ನಡುವೆ ಏರ್ ಇಂಡಿಯಾ ಎಕ್ಸ್‌ಪ್ರೆಸ್‌ನ ನೇರ ವಿಮಾನ ಸೇವೆ ಸೋಮವಾರ (ಅ. 26) ಆರಂಭಗೊಂಡಿದೆ. ಈ ಮೂಲಕ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಅಂತಾರಾಷ್ಟ್ರೀಯ ಸಂಪರ್ಕ ಜಾಲಕ್ಕೆ ಮತ್ತೊಂದು ಮಹತ್ವದ ಸೇರ್ಪಡೆಯಾಗಿದೆ.

2026ರ ಚಳಿಗಾಲದ ವೇಳಾಪಟ್ಟಿಯ ಭಾಗವಾಗಿ ಈ ಹೊಸ ವಿಮಾನ ಸೇವೆ ಆರಂಭಿಸಲಾಗಿದೆ. ಮಂಗಳೂರು ವಿಮಾನ ನಿಲ್ದಾಣದಿಂದ ವಾರಕ್ಕೆ ನಿಗದಿಯಾಗಿರುವ 58 ಅಂತಾರಾಷ್ಟ್ರೀಯ ವಿಮಾನಗಳಲ್ಲಿ 38 ವಿಮಾನಗಳು ಯುಎಇಯ ದುಬೈ, ಅಬುಧಾಬಿ ಮತ್ತು ರಾಸ್ ಅಲ್ ಖೈಮಾ ನಗರಗಳಿಗೆ ಸಂಪರ್ಕ ಕಲ್ಪಿಸಲಿವೆ. ಈ ಪೈಕಿ ದುಬೈಗೆ 20, ಅಬುಧಾಬಿಗೆ 16 ಹಾಗೂ ರಾಸ್ ಅಲ್ ಖೈಮಾಗೆ ಎರಡು ವಿಮಾನಗಳು ಕಾರ್ಯಾಚರಣೆ ನಡೆಸಲಿವೆ.

ವಾರದಲ್ಲಿ ಎರಡು ದಿನ ವಿಮಾನ ಹಾರಾಟ

ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಮಂಗಳೂರು ಮತ್ತು ರಾಸ್ ಅಲ್ ಖೈಮಾ ನಡುವೆ ಪ್ರತಿ ಸೋಮವಾರ ಮತ್ತು ಶನಿವಾರ ವಿಮಾನ ಸೇವೆ ಒದಗಿಸಲಿದೆ. ಐಎಕ್ಸ್ 871 ವಿಮಾನವು ಮಂಗಳೂರಿನಿಂದ ಬೆಳಗ್ಗೆ 9.30ಕ್ಕೆ ಹೊರಡಲು ನಿಗದಿಯಾಗಿದ್ದು, ಆರಂಭಿಕ ಹಾರಾಟದಲ್ಲಿ 146 ಪ್ರಯಾಣಿಕರನ್ನು ಹೊತ್ತೊಯ್ದಿದೆ. ಐಎಕ್ಸ್ 872 ವಿಮಾನವು ರಾಸ್ ಅಲ್ ಖೈಮಾದಿಂದ ಸಂಜೆ 6.25ಕ್ಕೆ ಮಂಗಳೂರಿಗೆ ಆಗಮಿಸಲು ನಿಗದಿಯಾಗಿದೆ.

ಪ್ರಯಾಣಿಕರಿಗೆ ಹೆಚ್ಚಿನ ಅನುಕೂಲ

ರಾಸ್ ಅಲ್ ಖೈಮಾದಿಂದ ಶಾರ್ಜಾ ಮತ್ತು ದುಬೈಗೆ ರಸ್ತೆ ಮಾರ್ಗದ ಮೂಲಕ ಸುಮಾರು ಒಂದು ಗಂಟೆಯಲ್ಲಿ ತಲುಪಬಹುದಾಗಿದೆ. ಹೀಗಾಗಿ ಈ ನೇರ ವಿಮಾನ ಸೇವೆಯು ಯುಎಇಯ ವಿವಿಧ ಭಾಗಗಳಿಗೆ ಪ್ರಯಾಣಿಸುವ ಕರಾವಳಿ ಕರ್ನಾಟಕದ ಪ್ರಯಾಣಿಕರಿಗೆ ಅನುಕೂಲವಾಗಲಿದೆ.

ಪ್ರಸ್ತುತ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು ಒಂಬತ್ತು ಅಂತಾರಾಷ್ಟ್ರೀಯ ಹಾಗೂ ಆರು ದೇಶೀಯ ವಲಯಗಳಿಗೆ ವಿಮಾನ ಸಂಪರ್ಕ ಒದಗಿಸುತ್ತಿದೆ. ಹೊಸ ಸೇವೆಯಿಂದ ಮಂಗಳೂರು ಮತ್ತು ಯುಎಇ ನಡುವಿನ ಪ್ರಯಾಣಿಕರ ಸಂಪರ್ಕ ಮತ್ತಷ್ಟು ಬಲಗೊಳ್ಳುವ ನಿರೀಕ್ಷೆಯಿದೆ.