ಮಂಗಳೂರು : ಮಂಗಳೂರು ನಗರದ ಅಭಿವೃದ್ಧಿಗೆ ಮಹತ್ವದ ಕೊಡುಗೆ ನೀಡಿದ ನಗರದ ನಿರ್ಮಾತೃ, ದಕ್ಷಿಣ ಕನ್ನಡ ಜಿಲ್ಲೆಯ ಮೊದಲ ಸಂಸದರಾಗಿದ್ದ ದಿವಂಗತ ಶ್ರೀನಿವಾಸ್ ಮಲ್ಯರ ಪ್ರತಿಮೆ ನಿರ್ಲಕ್ಷ್ಯಕ್ಕೆ ಒಳಗಾಗಿದೆ. ರಾಷ್ಟ್ರೀಯ ಹೆದ್ದಾರಿ 66ರ ಪಾದುವ ಸಮೀಪದಲ್ಲಿರುವ ಅವರ ಪ್ರತಿಮೆಯ ಸುತ್ತ ಪೊದೆಗಳು ಬೆಳೆದು, ಉದ್ಯಾನವನದ ಆವರಣವೂ ಶಿಥಿಲಗೊಂಡಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.
ಹೆದ್ದಾರಿ ಕಾಮಗಾರಿಯ ಸಂದರ್ಭದಲ್ಲಿ ಪ್ರತಿಮೆ ಇದ್ದ ಉದ್ಯಾನವನದ ಅರ್ಧದಷ್ಟು ಜಾಗವನ್ನು ತೆರವುಗೊಳಿಸಲಾಗಿತ್ತು. ಆದರೆ ಕಾಮಗಾರಿ ಮುಗಿದ ಬಳಿಕ ಉದ್ಯಾನವನವನ್ನು ಮರುನಿರ್ಮಿಸುವ ನಿಟ್ಟಿನಲ್ಲಿ ಈವರೆಗೂ ಸೂಕ್ತ ಕ್ರಮ ಕೈಗೊಳ್ಳಲಾಗಿಲ್ಲ ಎಂಬ ಆರೋಪ ಕೇಳಿಬಂದಿದೆ. ಒಂದೂವರೆ ವರ್ಷ ಕಳೆದರೂ ಉದ್ಯಾನವನಕ್ಕೆ ಮರುಜೀವ ನೀಡದಿರುವುದು ಪಾಲಿಕೆ ಹಾಗೂ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ನಿರ್ಲಕ್ಷ್ಯವನ್ನು ಎತ್ತಿ ತೋರಿಸುತ್ತಿದೆ ಎಂದು ಸ್ಥಳೀಯರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಅಭಿವೃದ್ಧಿಯ ಹರಿಕಾರನ ಸ್ಮಾರಕಕ್ಕೇ ಈ ದುಸ್ಥಿತಿ!
ನವ ಮಂಗಳೂರು ಬಂದರು, ಮಂಗಳೂರು ವಿಮಾನ ನಿಲ್ದಾಣ, ಮಂಗಳೂರು–ಬೆಂಗಳೂರು ರೈಲು ಮಾರ್ಗ, ಎನ್‌ಐಟಿಕೆ ಹಾಗೂ ಆಕಾಶವಾಣಿ ಕೇಂದ್ರ ಸೇರಿದಂತೆ ಹಲವು ಮಹತ್ವದ ಅಭಿವೃದ್ಧಿ ಯೋಜನೆಗಳಿಗೆ ಶ್ರೀನಿವಾಸ್ ಮಲ್ಯರು ಕೊಡುಗೆ ನೀಡಿದ್ದಾರೆ. ಉಳ್ಳಾಲ ಸೇತುವೆ, ಪುರಭವನ ಮತ್ತು ಸರ್ಕ್ಯೂಟ್ ಹೌಸ್ ಅಭಿವೃದ್ಧಿಯಲ್ಲೂ ಅವರು ಮಹತ್ವದ ಪಾತ್ರ ವಹಿಸಿದ್ದರು. ಮಂಗಳೂರಿನ ಅಭಿವೃದ್ಧಿಗೆ ತಮ್ಮದೇ ಆದ ಕೊಡುಗೆ ನೀಡಿದ ಮಹನೀಯರ ಸ್ಮಾರಕವೇ ಇಂದು ನಿರ್ಲಕ್ಷ್ಯಕ್ಕೆ ಒಳಗಾಗಿರುವುದು ವಿಷಾದನೀಯ ಎಂದು ಸಾರ್ವಜನಿಕರು ಬೇಸರ ವ್ಯಕ್ತಪಡಿಸಿದ್ದಾರೆ.
ಉದ್ಯಾನವನ ಮರುನಿರ್ಮಾಣಕ್ಕೆ ಆಗ್ರಹ
ಪ್ರತಿಮೆಯ ಸುತ್ತಲಿನ ಪೊದೆಗಳನ್ನು ತಕ್ಷಣ ತೆರವುಗೊಳಿಸಿ ಸ್ವಚ್ಛತೆ ಕಾಪಾಡಬೇಕು. ಈ ಹಿಂದೆ ಉದ್ಯಾನವನವಿದ್ದ ಸ್ಥಳದಲ್ಲೇ ಅದನ್ನು ಮರುನಿರ್ಮಿಸಿ, ಆವರಣ ಗೋಡೆಯನ್ನು ಪುನರ್ ನಿರ್ಮಿಸುವ ಮೂಲಕ ಪ್ರತಿಮೆಗೆ ಸೂಕ್ತ ರಕ್ಷಣೆ ಒದಗಿಸಬೇಕು ಎಂಬುದು ಸಾರ್ವಜನಿಕರ ಪ್ರಮುಖ ಬೇಡಿಕೆಯಾಗಿದೆ.
ಇದರ ಜೊತೆಗೆ, ಪ್ರತಿಮೆಯ ಪಕ್ಕದಲ್ಲಿರುವ ಸುಮಾರು ಮೂರು ಸೆಂಟ್ಸ್ ಜಾಗವನ್ನು ಅಭಿವೃದ್ಧಿಪಡಿಸಿ ಉದ್ಯಾನವನದ ಭಾಗವಾಗಿ ಬಳಸಿಕೊಳ್ಳಬೇಕು. ಈ ಮೂಲಕ ಶ್ರೀನಿವಾಸ್ ಮಲ್ಯರ ಸ್ಮಾರಕಕ್ಕೆ ಸೂಕ್ತ ಗೌರವ ಸಲ್ಲಿಸುವುದರ ಜೊತೆಗೆ ಮಂಗಳೂರಿನ ಇತಿಹಾಸ ಮತ್ತು ಅಭಿವೃದ್ಧಿಯ ಪರಂಪರೆಯನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವ ಕಾರ್ಯವಾಗಬೇಕು ಎಂದು ಕರಾವಳಿಗರು ಒತ್ತಾಯಿಸಿದ್ದಾರೆ.
ಅಧಿಕಾರಿಗಳಿಗೆ ಸಾರ್ವಜನಿಕರ ಪ್ರಶ್ನೆ
ಮಂಗಳೂರಿನ ಅಭಿವೃದ್ಧಿಗೆ ಮಹತ್ವದ ಕೊಡುಗೆ ನೀಡಿದ ನಾಯಕನ ಪ್ರತಿಮೆಗೇ ಅಭಿವೃದ್ಧಿಯ ಭಾಗ್ಯವಿಲ್ಲವೇ? ಸ್ಮಾರಕದ ಸುತ್ತಲಿನ ಪೊದೆಗಳನ್ನು ತೆರವುಗೊಳಿಸಿ ಉದ್ಯಾನವನ ಮರುನಿರ್ಮಿಸಲು ಇನ್ನೆಷ್ಟು ದಿನ ಕಾಯಬೇಕು? ಪಾಲಿಕೆ ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಈ ಬಗ್ಗೆ ಯಾವಾಗ ಕ್ರಮ ಕೈಗೊಳ್ಳಲಿವೆ?
ಮಂಗಳೂರಿನ ಹೆಮ್ಮೆ ಸಾರುವ ಶ್ರೀನಿವಾಸ್ ಮಲ್ಯರ ಸ್ಮಾರಕಕ್ಕೆ ತಕ್ಷಣ ಕಾಯಕಲ್ಪ ನೀಡಿ, ಪ್ರತಿಮೆಯ ಗೌರವವನ್ನು ಕಾಪಾಡಬೇಕು ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.
