ಮಂಗಳೂರು : 2026ರ ದಸರಾ ಹಬ್ಬದ ಪ್ರಯುಕ್ತ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮದ (ಕೆಎಸ್‌ಆರ್‌ಟಿಸಿ) ಮಂಗಳೂರು ವಿಭಾಗದ ವತಿಯಿಂದ ಆಯೋಜಿಸಲಾದ ದಸರಾ ವಿಶೇಷ ಪ್ರವಾಸ ಪ್ಯಾಕೇಜ್‌ಗಳಿಗೆ ಭಾನುವಾರ ಚಾಲನೆ ನೀಡಲಾಯಿತು. ನಗರದ ಲಾಲ್‌ಬಾಗ್ ಬಸ್ ನಿಲ್ದಾಣದ ಆವರಣದಲ್ಲಿ ನಡೆದ ಕಾರ್ಯಕ್ರಮದ ಮೂಲಕ ವಿವಿಧ ದೇವಸ್ಥಾನಗಳು ಹಾಗೂ ಪ್ರೇಕ್ಷಣೀಯ ಸ್ಥಳಗಳಿಗೆ ತೆರಳುವ ವಿಶೇಷ ಪ್ರವಾಸ ಆರಂಭಗೊಂಡಿತು.
ದಸರಾ ಹಬ್ಬದ ಹಿನ್ನೆಲೆಯಲ್ಲಿ ಭಕ್ತರು ಮತ್ತು ಪ್ರವಾಸಿಗರಿಗೆ ಅನುಕೂಲ ಕಲ್ಪಿಸುವ ಉದ್ದೇಶದಿಂದ ತಲಕಾವೇರಿ–ಭಾಗಮಂಡಲ, ಕೊಲ್ಲೂರು, ಸಿಗಂದೂರು, ಶೃಂಗೇರಿ ಹಾಗೂ ಮಂಗಳೂರು ನವದುರ್ಗಾ ದರ್ಶನ ಸೇರಿದಂತೆ ವಿವಿಧ ಪ್ರವಾಸ ಪ್ಯಾಕೇಜ್‌ಗಳನ್ನು ಆಯೋಜಿಸಲಾಗಿದೆ.
25 ಬಸ್‌ಗಳಲ್ಲಿ 1,128 ಪ್ರಯಾಣಿಕರು
ಭಾನುವಾರ ಮಂಗಳೂರು ಮತ್ತು ಉಡುಪಿ ವಿಭಾಗಗಳಿಂದ ಒಟ್ಟು 25 ಬಸ್‌ಗಳಲ್ಲಿ 1,128 ಪ್ರಯಾಣಿಕರು ದಸರಾ ವಿಶೇಷ ಪ್ರವಾಸ ಕೈಗೊಂಡರು.
ಮಂಗಳೂರು ವಿಭಾಗದಿಂದ ತೆರಳಿದ ಬಸ್‌ಗಳು ಮತ್ತು ಪ್ರಯಾಣಿಕರ ವಿವರ:
- ತಲಕಾವೇರಿ–ಭಾಗಮಂಡಲ: 3 ಬಸ್‌ಗಳು – 147 ಪ್ರಯಾಣಿಕರು
- ಕೊಲ್ಲೂರು: 6 ಬಸ್‌ಗಳು – 295 ಪ್ರಯಾಣಿಕರು
- ಸಿಗಂದೂರು: 5 ಬಸ್‌ಗಳು – 240 ಪ್ರಯಾಣಿಕರು
- ಶೃಂಗೇರಿ: 5 ಬಸ್‌ಗಳು – 245 ಪ್ರಯಾಣಿಕರು
- ಮಂಗಳೂರು ನವದುರ್ಗಾ ದರ್ಶನ: 3 ಬಸ್‌ಗಳು – 130 ಪ್ರಯಾಣಿಕರು
ಉಡುಪಿ ವಿಭಾಗದಿಂದ ತೆರಳಿದ ಬಸ್‌ಗಳು:
- ಶೃಂಗೇರಿ: 1 ಬಸ್ – 43 ಪ್ರಯಾಣಿಕರು
- ಕೊಲ್ಲೂರು: 1 ಬಸ್ – 28 ಪ್ರಯಾಣಿಕರು
ಈ ಮೂಲಕ ಒಟ್ಟು 25 ಬಸ್‌ಗಳಲ್ಲಿ 1,128 ಪ್ರಯಾಣಿಕರು ವಿವಿಧ ಧಾರ್ಮಿಕ ಕ್ಷೇತ್ರಗಳು ಮತ್ತು ಪ್ರವಾಸಿ ತಾಣಗಳತ್ತ ಪ್ರಯಾಣ ಬೆಳೆಸಿದರು.
ಅಧಿಕಾರಿಗಳು, ಸಿಬ್ಬಂದಿ ಉಪಸ್ಥಿತಿ
ಪ್ರವಾಸ ಪ್ಯಾಕೇಜ್‌ಗಳ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಕೆಎಸ್‌ಆರ್‌ಟಿಸಿ ಮಂಗಳೂರು ವಿಭಾಗದ ವಿಭಾಗೀಯ ನಿಯಂತ್ರಣಾಧಿಕಾರಿ ರಾಜೇಶ್, ವಿವಿಧ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಭಾಗವಹಿಸಿದ್ದರು. ಶ್ರೀ ವಿದ್ಯಾಗಣಪತಿ ಸೇವಾ ಕಮಿಟಿಯ ಅಧ್ಯಕ್ಷರು, ಉಪಾಧ್ಯಕ್ಷರು ಮತ್ತು ಸದಸ್ಯರು ಸಹ ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
ದಸರಾ ಹಬ್ಬದ ಸಂದರ್ಭದಲ್ಲಿ ಧಾರ್ಮಿಕ ಕ್ಷೇತ್ರಗಳಿಗೆ ಭೇಟಿ ನೀಡಲು ಬಯಸುವ ಭಕ್ತರು ಹಾಗೂ ಪ್ರವಾಸಿಗರಿಗೆ ಈ ವಿಶೇಷ ಪ್ಯಾಕೇಜ್‌ಗಳು ಅನುಕೂಲ ಕಲ್ಪಿಸಲಿವೆ.
 ಮಂಗಳೂರು ವಿಭಾಗದ ವತಿಯಿಂದ ಆಯೋಜಿಸಲಾದ ದಸರಾ ವಿಶೇಷ ಪ್ರವಾಸ ಪ್ಯಾಕೇಜ್){kind=link}