ಮಂಗಳೂರು : ನಿರ್ಮಾಣ ಹಂತದ ಸೇತುವೆ ಕುಸಿದು ಏಳು ಮಂದಿಗೆ ಗಾಯ.

ಮಂಗಳೂರು : ಪುಣಚ ಗ್ರಾಮದ ಬರೆಂಜ-ಕುರುಡಕಟ್ಟೆ ಸಂಪರ್ಕ ರಸ್ತೆಯ ಮಲ್ಲಿಪ್ಪಾಡಿ ಎಂಬಲ್ಲಿ ನಿರ್ಮಾಣ ಹಂತದ ಸೇತುವೆ ಕುಸಿದು ಬಿದ್ದು ಏಳು ಮಂದಿ ಗಾಯಗೊಂಡು ಪುತ್ತೂರು ಮತ್ತು ಮಂಗಳೂರಿನ ಆಸ್ಪತ್ರೆಗೆ ದಾಖಲಿಸಲಾದ ಘಟನೆ ವರದಿಯಾಗಿದೆ.

ಗಾಯಗೊಂಡವರನ್ನು ನಂಜನಗೂಡಿನ ಮಹೇಶ್ (63), ಗದಗದ ನಾಗರಾಜ (40), ಪುತ್ತೂರಿನ ವಿಜಯ (35) ಕೋಲ್ಕತ್ತಾ ಮೂಲದ ಮಣಿಯ ಕಾಂಕ್ರೀಟ್ ಮಿಕ್ಸಿಂಗ್ ಘಟಕದಲ್ಲಿ ಕೆಲಸ ಮಾಡುತ್ತಿರುವ ಯೂಸುಫ್ (50), ಮಾಥೋಬ್ (32), ಮತ್ತು ಅಕ್ತಾರುಲ್ (42) ಎಂದು ಗುರುತಿಸಲಾಗಿದೆ ಗಾಯಗೊಂಡವರನ್ನು ಪುತ್ತೂರು ಹಾಗೂ ಮಂಗಳೂರಿನ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಮಲ್ಲಿಪ್ಪಾಡಿ ಮೂಲಕ ಹಾದುಹೋಗುವ ದೊಡ್ಡ ಕಂದಕದ ಮೇಲೆ ಸೇತುವೆಯನ್ನು ನಿರ್ಮಿಸಲಾಗುತ್ತಿದೆ. ಡಬಲ್ ಸೆಂಟ್ರಿಂಗ್ ಬಳಸಿ ಸ್ಲ್ಯಾಬ್ ಹಾಕುವ ಕಾಮಗಾರಿ ನಡೆಯುತ್ತಿದ್ದಾಗ ಮೇಲಿನಿಂದ ಕಾಂಕ್ರೀಟ್ ಮಿಕ್ಸ್ ಸುರಿದಿದ್ದರಿಂದ ಕೆಳಭಾಗದ ಸೆಂಟ್ರಿಂಗ್ ರಾಡ್ ಜಾರಿದ್ದು, ಮೇಲ್ಭಾಗ ಕುಸಿದು ಬಿದ್ದಿದೆ ಎಂದು ವರದಿಯಾಗಿದೆ. ಸ್ಥಳದಲ್ಲಿ ಮೇಲ್ವಿಚಾರಕರು ಇಲ್ಲದಿರುವುದು ಅವಘಡಕ್ಕೆ ಕಾರಣವಾಗಿದೆ.

ಸೇತುವೆಯು ನೆಲದಿಂದ 24 ಅಡಿ ಎತ್ತರದಲ್ಲಿದೆ ಮತ್ತು ನಿರ್ಮಾಣ ಕಾರ್ಯವನ್ನು ಕೆಆರ್‌ಡಿಎಲ್ ನಡೆಸುತ್ತಿದೆ. ಕೆಲಸವನ್ನು ಸರಿಯಾಗಿ ಯೋಜಿಸುವಲ್ಲಿ ನಿರ್ಲಕ್ಷ್ಯದಿಂದ ಘಟನೆಯನ್ನು ತಜ್ಞರು ಆರೋಪಿಸುತ್ತಾರೆ.